وكت الخوف شاتل بينة نبتة ليل...واحدنة بدموعة يداري اهاتة
منتظرين باجر بلكي باجر عيد... بلكي اعلة الشفايف يبني ضحكاتة
واقع بس مرير ويخجل التاريخ...يذكرنة اعلة بابة وبين صفحاتة
فاركنة البخت جي يحس بينة انباك..لون المستحة وصوفرن وجناتة
................................... ....................................
كبل بالباب غيرة وتعرك الحيطان..وتبين بالحرامي الباك شاراتة
هسة يسد اذانة الباب من يفوت..ابن الداسنة اعلة الشرف خطواتة
شارع دم اخوتك جدمك ايخط بيه..وتتنفس جثث من مكبرة ذاتة
وامس مسجد صلاتك اذن من الخوف.. والقران ذبحوا راس اياتة
..................................... .......................................
دكلي ليا متاهة اتريد اروح وياك.. وانة ادري بضميرك منذبح ذاته
تتراهن براسي وراسك شالك تاج..وانة راسي السمة الطشروا نجماته
دليتك بظهري وجان ساتر ليك..وبخنجر الغير اتزيد طعناتة
انت اشلون اخوي ؟ومااشك قابيل..اذا شافك تزيد بحيرة صفناتة
..................................... ........................................
شميتك مرض يسحل قطارك موت..راعي وللذيابة يرخص بشاتة
شتامل بعد غدرك بروحك صار.. هل كد مازفيرك خان شهكاتة
خالد الفراتي