الجزء السابع
حمدان: الصراحة... (كان يبا يقولها ان يباها بس ما رام) اباج تعطيني ايميلج عسب أطرش لج فورواردز و جي.
الريم( وهي تضحك): يعني احين انت ما رمت تقول هل كلاد جدام ابوية؟ والله حمدان انت مرات صدق تضحكني.
حمدان( و هو مبتسم) ان شاء الله دوم اروم أضحكج.
الريم: اذا هي سوالفك اكيد دوم بضحك و يا ويهك.
(وطلعوا من الميلس و ساروا يلسوا في الصالة. حمدان يلس ويا قوم منصور و هل مرة الريم تمت وياهم.(
منصور( و هو يغمز لحمدان): شو كنتوا تسوون داخل؟
حمدان: سلامتك... ما شي
ناصر: ونة ما شي... يا الله اعترف قول شو كنت تسوي ببنت اخوية؟
حمدان: يعني غصب؟؟؟
ناصر: هيه نعم
حمدان: كنت ابا آخذ منها ايميلها
ناصر: احين انت ساحب البنت لين الميلس بس عشان تاخذ ايميلها؟؟؟؟؟
حمدان ( يجذب) : .....هيه
منصور ( و هو يبا يغايض حمدان): أقولج ريمو
ريم: شو؟
منصور: شو شو؟ قولي نعم طال عمرك!
ريم: كيفي انا اوكي
منصور: زين ما علينا منج يالدلوعة.. بس تحملي من حمدان ترا عنده كم من بنت ومغازلجي عالآخر. كان مرابع امريكيات يوم كان في امريكا
ريم(وهي فاجة عينها) صدق والله حمدان؟ الصراحة طحت من عيني
حمدان: والله العظيم ان منصور جذاب و اكبر خراط في البلاد. احين انا متى رابعت امريكيات يا الجذاب.
منصور( يبا يغايظ حمدان زيادة): بلاك جي نسيت؟ تحيد يوم هاييج المرة قات لي اذا ابا وحدة شقرا و أحلى عن الريم؟
الريم: نعم نعم اخ حمدان اصلا ما شي حد احلى عني اوكي
حمدان: والله يا الريم احلف لج ان عمج هذا جذاب بس يبا يشوه صورتي عسب ما ترمسيني عالنت.
منصور: اييه الريم اتمصخر وياج يا الدبة.
الريم: انا مب دبة..... حمدان طالع شو يقول عني.
ناصر: ما شاء الله يعني احينة فنشتي ابوج و استوى حمدان المحامي مالج؟
الريم: عادي انزين يستوي الواحد يكون عنده اكثر عن محامي واحد
حمدان: بس منصور.. اصلا الريم حلوة و رشيقة لا تعيب عليها.
الريم( و تبتسم ابتسامة النصر) : هههه ادري
وتموا الشباب والريم يضحكون ويا بعض و حمدان تم يسولف لهم عن الجامعة و عن حياته في امريكا لين ما استوت الساعة 10:30
فاطمة: يا الله يا أخوية انا بسير البيت الحين تدري به بو العيال احينة يترياني
بو الريم: وين يا اختي؟ تو الناس
فاطمة: ما عليه اخوية اليايات اكثر. يا الله حمدان فديتك...مشينا.
ناصر: وين توا الناس تموا شوي بعد فاطمة و الله يلستكم ما تنمل
حمدان: صدق والله انا لازم اسير من البارحة ما رقدت.
بو الريم: خلاص عيل...نشوفكم عخير و تحملوا بعماركم عدل.
فاطمة: الله يحفظك اخوية مع السلامة.
حمدان: مشكور والله يا خالي وايد استانست.
بو الريم: ما سوينا شي يا ولدي.. حياك الله في كل وقت.
حمدان: مع السلامة
وطلعوا حمدان وامه فاطمة وعقبهم بشوي طلعوا منصور وناصر لأنهم كانوا بيسيرون الخيمة مالت ربيعهم وبيسهرون ويا الشباب شوي
تمت الريم تشل الأكل والفوالة المطبخ وساعدت الخدامات شوي. بعدين سارت ويلست حذال أبوها الي كان يطالع الأخبار كالعادة.
بو الريم: بعدج واعية ؟ انا تحسبتج سرتي ترقدين.
ريم: احين بسير...
بو الريم: يا الله فديتج وراج مدرسة باجر
ريم: ادري بس حلاته باجر يوم اربعاء.
بو الريم: ههه ...ما بتطلعين باجر؟
ريم: مادري يمكن العاش تيي باجر و تبات عندنا...عادي؟.
بو الريم: ما يباله كلام الله يهديج..اكيد عادي و ترا العاش نفس اختج.
ريم: هيه والله فديتها.
بو الريم: الله يخليكم لبعض
ريم: يا الله عيل باباتي بسير ابدل ملابسي و براجع دروسي شوي و برقد.
بو الريم: الله يحفظج غناتي....تصبحين عخير
ريم: و انت من اهله.
حبت الريم ابوها عراسه و بعدها سارت فوق حجرتها.
في الصوب الثاني من الفريج وعند كافتيريا محارة البحر كانوا قوم هزاع يالسين ويسولفون ويشربون لهم من الكوكتيل الفنان الي يسويه محارة البحر.و عقب شوي ياهم هزا ع و هو فرحان و شاق الحلج.
خالد: بلاه بو الشباب...اليوم فرحان
احمد: يمكن يحب....
سعيد: هههههههه ونة يحب حلوة هاي احمدو
هزاع(وهو يغني) : مهما جرى منك و صار انا تراني في انتظار...صابر على ما هو جرى لي اطريك في الليل و نهار.
خالد: لا و يغني اغنية عيظة بن طناف....اكيد شي مستوي...يا الله قول و انا اخوك.
هزا ع: ما شي...بس برمس الزعلان اليوم
احمد( و هو مستغرب) : منو الزعلان؟؟؟ محد زعلان منك
سعيد: هيه صح منو
خالد: ليكون تحب من ورانا؟؟؟
هزا ع: جنة جي
سعيد+احمد+ خالد: منوووووووووووووووووووووووووووووووووووووووووووووووو و؟!!
هزاع: ناس.... هاهاهاي( قام من عندهم(
خالد: وين بتسير....ما شي سيرة لين ما تقول منو تحب.
هزا ع: افففففففففففففففففففففف يعني غصب.؟
احمد+سعيد: هيه
هزاع : اوكي...بس اول شي خلوا خلّود يخوز ايده عني
احمد: خوز ايدك عنه....قابضنه جنة بيشرد عنك...
خالد: انزين خوزنا يا الله قول
هزاع: شفتوا نص الناس؟؟؟
احمد( و هو مستغرب) : هاااأ؟
هزا ع: هاييل الي احبهم (وشرد هزاع وتم يركض سريع لين ما وصل بيتهم وطبعا قوم خالد وراه بس ما راموا يركضون لين بيت هزا ع لأنهم توهم شاربين كوكتيل ثجيل و بالعين كم من سندويشة(
سعيد: ما عليه هزاع بس والله بتشوف... بنعرف منو حبيبة قلبك
هزا ع ( وهو يصارخ من بعيد): هاهاهاي ولا عمركم بتعرفون....باي
خالد: باي يا الخاين بس والله ان ما خليتك تقول منو ما اكون خالد بن عتيق
احمد: ذليتنا ذل باسمك انت...كل ما استوى شي قلت " ان ما سويت جي ما اكون خالد بن عتيق"
خالد: و انا صاج يا اخي
سعيد: انزين انزين فكونا من هالسالفة....يا الله بتسيرون عند قوم حسّون ...بيلعبون كرة قدم بعد شوي
خالد: هيه يا الله بسير وياك...بتيي احمدو؟؟
احمد: ما اروم مواعد الأهل برد هالوقت....يا الله بشوفكم باجر
خالد: اوكي يا الله مع السلامة
سعيد: حوو باجر لا تنسى تييب لي الأفلام اوكي؟
احمد: ان شاء الله.
الي ما كانوا يعرفونه الشباب هو انه احمد ربيعهم يحب لطيفة اخت هزاع من يوم هم صغار. كان دوم يلعب وياها وما يرضى حد يضربها. بس طبعا يوم لطيفة دشت الاعدادية اهلها ما كانوا يخلونها تلعب ويا الأولاد.
في البداية كانت عادي تسلم عأحمد من بعيد بس احين ما تروم لأنه اهلها بيشكون فيها. لطيفة بعد كانت تحب احمد وهو يدري انها تحبه لأنه مرة قالت له انها ما بتلعب وياه نفس قبل بس بتحبه للأبد واحمد عمره ما نسى هالكلمات. احمد جذب عالشباب ورد البيت لأنه كان يبا يسير السطح ويطالع لطيفة وهي يالسة ويا اهلها في حوش البيت. كانت شوفتها بالنسبة له تسوى الدنيا وما فيها. من قد ما احمد يحب لطيفة كان ناوي يخطبها غقب ما يخلص هالثانوية السنة.
رد هزاع البيت وسلم عل أهل عالسريع وعقبها سار حجرته وقفل الباب وفج الكمبيوتر وتم يتريا الريم. ما شافها اونلاين وخاف انها ما بتدخل.
في بيت الريم الريم كانت مبندة الليتات وخلاص بترقد بس فجأة تذكرت هزاع فسارت بسرعة وفجت الكمبيوتر ودخلت اونلاين.
هزا ع: السلام عليج
ريم الدماني: و عليك السلام.
هز اع: اشحالج الريم؟
ريم الدماني: بخير الله يسلمك
هزا ع: والله كنت خايف انج ما بتدشين
ريم الدماني: اها....لا دشيت
هزاع: ادري.....
ريم الدماني: خير هزاع شو كنت تبا تقول؟؟؟
هزاع: تدرين بي يالريم انا حسبة اخوج والي يضرج يضرني ودوم ابا اشوفج تضحكين والي استوى في مارينا مول كان دفاعا عنج وعشان اراوي الناس ان انتي لج حد يدافع عنج .
ريم الدماني: هزاع...انسلى سالفة مارينا مول انا خلاص سامحتك
هزاع: صدق يا الريم.. خلاص سامحتيني؟
ريم الدماني: هيه
هزا ع: الللللللللللللللللللله هذا احلى يوم في حياتي يوم انج رضيتي عني
ريم الدماني: ليش؟ هل قد رضاي يهمك؟؟
هزا ع: و اكثر...والله اكثر انتي ما تعرفين انتي شو بالنسبة لي..
ريم الدماني: ليش؟ شو انا؟
هزا ع: انتي حياتي وروحي وكل دنياي يا الريم
ريم الدماني( وبدت تستغرب من رمسة هزاع ) : هزاع اييه شو يالس تقول؟؟؟؟؟
هزاع : ما عليج من الي قلته...ألي بقوله الحين اهم
ريم الدماني: انزين شو هو؟
هزاع : انا يـ الريم ..............