ليه حنا افترقنا ؟ لــــيــــه؟!!!

حتى انت يا جرحي؟!! غدرت وتشافيـت ؟!
هانت عليـك العشـره اللـي اجمعتنـا؟!!

قلّي :وش اللي شفت من بعد ما اقفيت؟! ؟!
وبا قـول لـك هـو ليـه حنّـا افترقنـا

قصرت في حقك ؟! خذلتـك؟! تخليـت ؟!
طيـب!! تبـي ترحـل وتتـرك وطـنـا؟!

كنت الوحيد اللي بقـى لـي مـن البيـت
الـلـي جمعـنـا بالـفـرح واحتضـنـا

انتـه.. وانا..والحلم..واحساسـه الميْـت
وآمـال كانـت يــوم كـنـا.. وكـنـا

صحيـح بـأول مولـدك كـم تمنـيـت:
اذبحْك...لـكـنـي ولفتك...وعـشـنـا:

والدمـع فـي عينـي وانـا بعـد غنيـت
اليـن غضنـا جْـروح يـوم اسمعتـنـا

كم عيد يا جرحـي بصـدري تناغيـت ؟!
عيـدت مـن غيـرك ؟!ودوم اتمـنـا !!

كـل عيـد اجـدد ثوبـك ولـو تـأذيـت
واسكـب لـك دموعـي لجـل مـاتحنـا

والاعبك..واضحـك معك..كلمـا جـيـت:
تركـض مبيـن العـوج ..منا...ومـنـا

يا ليت تدري كم بصدري مـن ال(ليـت)!!
ويا ليت لـو بـه "ليـت" تفهـم وجعنـا

بذمـتـك قـلـيّ اذا يــوم حـنـيـت
وللحيـن تذكـر كـم بكينـا وضحكنـا؟!

وقلّي: وش اللي شفت يومك تشافيـت ؟!
وقلي بعـد: هـو ليـه حنـا افترقنـا ؟!