هذه الرسالة تفيد بأنك غير مشترك أو لم تسجل دخولك بعد. للاشتراك الرجاء اضغط هنــا
هذه الرسالة تفيد بأنك غير مشترك أو لم تسجل دخولك بعد. للاشتراك الرجاء اضغط هنــا
 |
|
|
 |
 |
25-12-2007, 10:09 PM
|
#21 (permalink) |
|
عضو مشارك
 |
الجزء الثامن
هزاع( وهو مرتبك): أحبج و الله احبج و ابا اخطبج ريم الدماني: شووووووووووووووووووووووووووو؟!!!! هزاع: والله يالريم انتي تدرين بي انا ما عندي هالسوالف البطالية وصدق أباج تكونين حرمتي.. ووالله اول ما اخلص الثانوية بخطبج. ريم الدماني: هزاع بلاك انت جي؟ شوي شوي.... هزاع: والله يا الريم كل شي اقوله صدق و من قد ما احبج ابا آخذج الحين ريم الدماني: الصراحة.. ما اعرف شو اقول لك....صدمتني...بس دخيلك هزاع لا تطري هالشي مرة ثانية اتريا لين ما اخلص ثانوية و عقب اخطبني.. ما ابا هل أشياء تشغلني عن دراستي هزاع: وانا بعد ما اباها تشغلج عن دراستج.. بس انا ما كنت اروم اتريا اكثر عسب اخبرج ريم الدماني: اسمح لي هزاع بس بطلع اوفلاين..ألصراحة انت وايد فاجأتني.. احس راسي يعورني..... هزاع: الريمممممممممم قبل لا تسيرين ابا اطلب منج طلب ريم الدماني: خير هزاع: لا تسوين لي بلوك.. لا تخافين ما بتغير عليج برمسج نفس قبل.. بس اعرفي اني دوم بحبج.. والي اتمناه انج في يوم من الأيام تبادليني نفس هالشعور.. ريم الدماني: ............. تصبح عخير هزاع: و انتي من اهل الخير. الريم كانت وايد متفاجأة من رمسة هزاع. كانت تحس بأحاسيس غريبة. كانت نفس الوقت فرحانة. أول مرة حد يقول لها انه يحبها. الصراحة هي كانت معجبة بهزاع وشخصيته بس مب لدرجة انها تحبه. كانت تبا تطير من الفرحة. تمت تفكر وتقول اكيد هزاع دافع عني في المارينا هذك اليوم لأنه كان يحبني. ياااااااااااي والله ما اصدق ان هذا يستوي لي. كانت تبا تخبر لطوف بس قالت احسن لو خلتها مستورة. ورقدت الريم والابتسامة مرسومة عشفايفها. اما هزاع فكان خايف. كان خايف ان الريم ما ترمسه مثل قبل. ما كان يبا يخسرها. كان صدق يبا يخطبها وقرر ان يرمس ابوه اول ما تخلص الثانوية. الي كان خايف منه هزاع هو ان حد يخطب الريم. كانت الريم حلوة ومزيونة والكل يتمناها. ما كان يستحمل يشوفها ويا حد ثاني. كان يحس ان اذا الريم خذت واحد ثاني بيموت. خلاص الريم استوت داخل دمه وقلبه ينبض باسمها وما يبا غيرها في حياته. في الصوب الثاني من بوظبي كان حمدان يالس ويا امه فاطمة قبل ما يسير يرقد وقرر ان يفاتحها بالموضوع الي في باله. حمدان: اقول اماية..... فاطمة: عيونها آمر...... حمدان: شفتي كيف الريم بنت خالي تغيرت..... قبل كانت مول مب حلوة و شكلها عادي... فاطمة: هيه ما شاء الله عليها تخبل... تصدق شي ناس رمسوني قالوا يبونها... حمدان: منو هل ناس؟؟ و انتي شو قلتي لهم؟ فاطمة: هاييل قوم محمد سعيد اذا تعرفهم... و انا ما رمت اقول لهم شي يا ولدي ..كل الي قلته ان البنت بعدها في المدرسة. و اذا يبونها خلهم يتيريون لين ما تخلص الثانوية و عقب يخطبونها. حمدان: لا يا اماية انا مب موافق الصراحة....ها ولدهم مغازلجي و مال مشاكل...و بعدين مب حلو... فاطمة: لا والله؟ الناس ياخذون عالحلاة ولا شو؟؟؟ حمدان: انسي السالفة.. احين انا عندي سالفة لج فاطمة: خير حمدان: اماية احين انا خلصت الجامعة و بشتغلو عندي ارض بس مب باجي غير العروس متى بتخطبين لي؟ فاطمة: قريب ان شاء الله..... انت شي وحدة في بالك تباها و له تباني اخطب لك عذوقي؟؟ حمدان:لا امي فديت خشمج العروس موجودة و انتي تعرفينها عدل فاطمة ( وهي عاقدة حياتها تحاول تعرف منو) : اكيد وحدة من بنات عمتك موزة حمدان: لا وععع ما اباهن كل وحدة متكبرة مادري عشو.....انا ابا وحدة ثانية تخبل وايد حلوة فاطمة: منو يا حمدان ؟ والله انا هب ياهل عشان العب وياك و اتم اخمن انت منو تبا حمدان: هههههههههههه فديتج يا العيوز فاطمة: العيوز حرمتك حمدان: والله صدق اماية انا ابا الريم بنت خالي محمد فاطمة( فاجة عيونها): تبا الريم؟؟؟؟؟؟ حمدان: هيه بلاج مستغربة...بنت خالي واحسن من الغريبة فاطمة: وانا اقول ليش مساعة يالس تعايب عولد محمد بن سعيد حمدان: والله يا امي الريم كل شي فيها حلو.... جميلة... و ذدكية و بسرعة تنحب. حمدان: ما عليه اماية معذورة تراها...امها اجنبية و طول عمرها عايشة في الغربة... فاطمة: هيه والله حليلها هل بنت...انحرمت من امها و هي بعدها ما كملت ال 17 حمدان: دخيلج اماية خلينا باجر نسير انا وانتي و ابوية و نخطب الريم ... فاطمة: بلاك انت جي ... اثقل شوي.. و بعدين البنت بعدها في المدرسة. حمدان: عادي اماية بس خطبة.... و عقب المدرسة بنملج.... فاطمة: و الجامعة؟؟ حمدان: لا تخافين انا اباها تسير الجامعة...و ان شاء الله بتدخل التقنية او جامعة زايد... و اذا تبا تدرس برا انا مستعد اسافر وياها و اتم معاها لين ما تخلص فاطمة( و هي تطالع و لدها و تبتسم): و الله كبرت حبيبي و تبا تخطب و تعرس... حمدان: هاي سنة الحياة اماية.... بس فديتج الله يخليج باجر نسير اوكي؟ فاطمة: لازم ارمس أبوك اول ما يستوي جي نسير..لازم اشاوره حمدان( وهو يضحك): ما عليج خلاص انا رمسته قبل ما ارمسج و هو موافق فاطمة: ثرك هب هين يا ولد سلطان حمدان: هههههه يا الله عيل اماية انا بسير ارقد شوي ... فاطمة: تصبح عخير غناتي... حمدان: و انتي من اهله يا أحلى ام في هل كون فاطمة : كل ها عشان الريم حمدان: لا انتي اصلا من قبل حلوة بس يوم وافقتي انج تخطبين لي الريم استويتي احلى فاطمة: مسود الويه سير ارقد ابرك لك حمدان: ههه ادري.... يا الله مع السلامة فاطمة: الله يحفظك... في اليوم الثاني الصبح نشت الريم وهي مستانسة. ما تعرف اذا هي مستانة لأنه هزاع يحبها وله عشان اليوم اربعاء. سارت المدرسة و شافت لطوف و ربيعاتها و سارت عندهن. الريم: س س السلام عليكو لطوف: بلاج انتي مرتبشة من الصبح الريم: مادري احس اني وايد مستانسة لطوف: اقولج انعقد السلام ما بين البوسنة والهرسك وله؟ ( كانت تقصد اذا هي تصالحت و يا هزاع وله لا( الريم: هههههه حلوة هاي....هيه انعقد..... لطوف: عيل انا اقول ليش البوسنة اليوم فرحانة وشوي بتطير علينا( تقصد هزا ع( الريم: ليش هي وايد فرحانة؟.... لطوف:: اففففففففففففففففففففف وايد وايد... حليلها... الريم( و تذكرت يوم هزا ع قال انه يحبها(: هيه ندى: بسكن ألغاز.... يا اللله منو البوسنة والهرسك.. الريم: شو عادتج شواخ ؟ اشوفج استويتي فضولية نفسها ندى: عادي كل واحد و ياخذ من ربيعه صفة من صفاته لطوف: ما لقيته غير هالصفة يا التعبانة شيخة: بسكن اوكي والله راسي يعورني الريم( حاطو ايدها عجتف شيخة) : بلاج شواخ؟ عسى ما شر شيخة: مادري والله ميمي بس طول الليل ما رقدت ندى: منو الحبيب؟ شيخة: فايجة انتي.....بس أبوية البارحة رقد في حجرتي...لأنه العيوز طردته.... و تم يشاخر علي طول الليل والله تقولين أسد هب انسان ندى+ الريم+ لطوف: ههههههههههههههههههههههههههههههههههههههههههههههههه شيخة: والله ما يضحك...انا المفروض احينة يعطوني جائزة و كأس لأاني رمت أستحمل و ما جتلت ابوية..والله لو حد ثاني جان خش دلاغ في حلجه الريم: ايييه شواخ شو هالرمسة عيب عليج هذا أبوج وانيت صايمة احينة شيخة: استغفر الله بس الصداع وايد قوي ( و رن الجرس) لطوف: قومي بوديج الحمام غسلي ويهج و ان شاء الله تستوين اوكي انتي بس هدي أعصابج الريم: سوري والله شواخ كنت بيي وياج بس علي امتحان ندى: انا بخبر الأبلة انج بتتأخرين اوكي؟ شواخ: ما عليه الريم فديتج انتي سيري الصف انا مافيني الا العافية...الا صداع مب شي جايد. الريم: يا الله عيل ياي لطوف+شواخ: باي.... الساعة 1:30 خلصت الدوامات وردت الريم البيت كانت بعدها فرحانة. دشت وعقت جوتيها وسلمت عأبوها الي كان يترياها في الصالة. الريم: سلام عليك الغالي ( و حبته عراسه) بو الريم: و عليج السلام....اشحالها القمر اليوم الريم: بخير الله يسلمك...اقول باباتي ليش اليوم راد من وقت مرة ثانية؟ بو الريم: لا فديتج غيروا النظام في الشركة و كل يوم برد الساعة 1 الريم: الله يعني كل يوم برد و بشوفك هني؟ بو الريم( و هو يبتسم): هيه الريم( ضمت أبوها) : أحلى شي بو الريم: ههه يا الله فديتج سيري بدلي ملابسج و صلي اوكي؟ الريم: ان شاء الله ( وسارت صوب الدري( بو الريم: ميمي الريم: هلا بو الريم: اليوم عمتج فاطمة و ريلها و حمدان بيون عندنا عقب الفطور... الريم: ليش ما يفطرون عندنا.؟ بو الريم: معزومين عند عمة حمدان.... الريم: اها....تباني أقول حق الخدامت يجهزن شي؟ بو الريم: لا فديتج بطلب من زهرة لبنان الريم: اوكي عيل ( و سارت فوق و بدلت و عقبها رقدت شوي) الساعة 5 العصر يت العاش بيت الريم لأنها كانت بتبات عندهم الليلة ودخلت وشافت بو الريم الي هو عمها يالس في الصالة و يقرا قرآن العاش: السلام عليكم بو الريم( نش عشان يسلم على العاش) : و عليج السلام حيا الله من يانا.....اشحالج العاش و اشحال اهلج العاش: كلنا بخير عمي انت اشحالك؟ بو الريم: انا بخير دامج بخير العاش: عيل وين الريم عمي؟ بو الريم: الريم فوق فديتج سيري وعيها العاش: ان شاء الله عيل بخليك... بو الريم: اوكي سارت العاش فوق و لقت الريم راقدة في سابع النومة و قالت احسن شي انها تزيغها العاش( تصارخ): الريممممممممممممممممممممممممممممممممممممم مم حريجة الريم ( نشت وهي زايغة): هااااااااااااااااا شووو وين العاش: هههههههههههههههههههههههههههههههههههههههههههههه عقولة محمد الصيرفي " صادووه" الريم( وهي ترمي المخدة عالعاش) : والله انج بايخة يا السبالة....حرام عليج زين ما وقف قلبي العاش: هههههه جنية انتي ما يوقف قلبج الريم ( وهي تتنفس بالقو) : اطلعي برا العاش: شو؟؟ الريم: ابا ابدل العاش: انزين بدلي في الحمام الريم: ما اداني العاش: انزين ما بطالع والله ما بطالع الريم( و هي تدز العاش عشان تطلع برا) : يا الله برا بس خمس دقايق العاش: افففففف منج ( و طلعت برا( عقب ما بدلت الريم نزلن تحت البنات و تموا يطالعون مسلسل " ثمن عمري" و عقبها فطرن و يا بو الريم. و سار هو المسيد و تمن يسولفن. الريم: هيه صح العاش ترا اليوم قوم عمتية فاطمة و حمدان بيون عندنا عقب شوي العاش: حمدان بيي بعد ؟؟؟؟؟؟؟؟؟ ( و هي مرتبكو و مستحية( الريم: هيه ...بلاج العاش؟؟ العاش: احسن شي نسير نبدل و نتعدل ما يستوي نيلس جي؟؟ الريم: عادي نحن دوم جي نيلس.....بلاج العاش؟؟؟ العاش: ما شي الريم... والله انا عادي ما بلاي شي الريم: والله تقولين....يا الله حلفتج العاش.. ممممممممم....الصراحة..... انا الريم: يا الله قولي انا نفس اختج العاش: انا احب حمدان ... و احينة اول مرة بشوفه عقب ما رد من امريكا الريم( و هي فاجة عوينها) : تحبين؟؟؟؟؟؟؟؟؟؟؟؟؟؟؟؟؟؟؟؟؟؟؟؟ العاش( و ويها احمر) : هيه الريم: و هو يدري؟؟؟ العاش: انا يا الله يا الله ارمسه... كيف تبيني اقوله اني احبه.. والله بموت.... الريم( وهي تضم العاش) : والله كبرتي يا العاش و استويتي تحبين؟؟ العاش( و هي منزلة راسها) :...... الريم: لا لا و تستحي بعد..... هيه يا حمدان وين بتلاقي احين عن العاش.. دخل بو الريم ويا قوم حمدان الميلس و زقر البنات عسب اين يسلمن. سلمت الريم عليهم بس العاش ارتبكت و ويهها احمر يوم مدت ايدها عشان تسلم عحمدان. و بعدين يلسن البنات عدال عمتهن فاطمة حمدان : اشحالج العاش؟؟ العاش( بصوت واطي) : بخير ربي يسلمك بو الريم: والله يا بو حمدان انت مول ما تنشاف دومك في هل مؤسسة بو حمدان: شو اسوي يا اخوي.... لازم حد يباري الشغل.... بو الريم: هيه صدقت..... انزين خل حمدان يشتغل وياك بو حمدان: ان شاء الله بيبدا الدوام عقب اسبوع بو الريم: زين واله يا حمدان...بارك الله فيك... احسن شي سويته بوم انك تبا تساعد ابوك حمدان: هذا واجب يا خالي..و اذا انا ما وقفت ويا الوالد عيل منو بيوقف؟؟ بو الريم: جواب ريال.... حمدان( التفت صوب الريم و ابتسم) : اقول الريم... اشحال الدراسة وياج الريم: والله اوكي..... امتحانات نص السنة عقب شهر و انا من احينة لازم ادرس حمدان: شدي حيلج عدل اوكي؟ الريم : اوكي هنيه العاش غارت من الريم. كانت تقول في خاطرها انا بعد ثانوية عامة ليش حمدان ما سأل عني. و بدا ويهها يتغير و كانت جنها معصبة فاطمة: والله يا أخوية نحن اليوم يايينك في موضوع خاص بو الريم: خير بو حمدان: ان شاء الله خير الريم (حست ان موضوع خاص و ما كانت تبا تضايج عليهم فشلت العاش و طلعن برا و تمن يطالعن مسلسل" عمي ألوان( بو حمدان: والله يا أخوية يا بو الريم نحن يايينك اليوم عسب نخطب الريم لولدي حمدان بو الريم: هاي الساعة المباركة و الريم طبعا ما بتلاقي حد احسن عن ولد عمتها بس بعدها صغيرة يا سلطان و ما خلصت مدرسة فاطمة: ندري يا أخويي....بس حمدان مستعيل..و نحن احينة ما نبا الا خطبة و الملجة ان شاء الله عقب الامتحانات بو الريم: انا من ناحيتي موافق بس تدرون ان الشور الأول و الأخير للريم فاطمة: انت شاورها و رد علينا خبر.. و نحن مب مستعيلين عالزواج بس نبا خطبة بو الريم: غالية و الطلب رخيص يا اختي بو حمدان : ما قصرت تموا يوسلفون شوي و عقبها أذن العشاء . ساروا طبعا الرياييل المسيد و أم حمدان استأذنت و سارت البيت لأنه بيون لها حريم. و عقب ما خلصت صلاة التراويح استأذن حمدان من أبوه و خاله و قال ان بيسير بيسلم عربعه مال البطين. حمدان كان ربيع قوم هزا ع و يعرفهم من زمان بس ويم سار يدرس في أمريكا قطع عنهم و بما ان رد الحين البلاد قرر ان يسلم عليهم. سار حمدان وشافهم يالسين عند ملعب كرة قدم هم مسوينه بروحهم حمدان: السلام عليكم هزاع: وعليكم السلام.... حوو شباب طاعوا منو تذكرنا خالد ( لف عحمدان): وينك انت يا ريال.. سرت و نسيتنا...لا تدق ولا شي؟ حمدان: والله يا أخوي ادري اني مقصر معاكم بس تدرون اني انشغلت بالدراسة احمد: مسموح يا أبوي.... انت اشحالك و شو تسوي هني.. أشوفك ياي من دون موتر؟ هزا ع: هيه والله صح...عندك حد في الفريج؟؟ حمدان: هيه عمي ساكن هناك.. ( و راواهم البيت( هزاع: هيه هذا البيت مول لازق في بيتنا... شفت البيت الي من فوق احمر..هذا بيتنا... أحمد: و الي عداله بيتنا.. خالد: و الي مجابل بيت هزا ع هو بيتنا حمدان: زين والله عيل دوم يوم بيي بيت عمي بمر و بسلم عليكم و بنسير نيلس عند دكان عباس نفس أيام قبل هزا ع: هيه والله يبالنا خالد: بلاك حمدان أشوفك مستناس اليوم حمدان: هيه والله شوي و بطير من الفرحة أحمد: خير شو السالفة؟ كل ها عشان شفتنا؟؟ حمدان: مممممم عشانكم و عشان توني رمست عمي لأني ابا أخطب بنته خالد: بنته هاي الي ما تلبس شيلة وعباة حمدان: هيه و انت شو دراك بها؟ (كان شكله معصب( خالد: يا اخي بيتنا مجابل بيتهم و ما تباني أشوفها؟؟ هزاع ( وهو منصدم) : لحظة لحظة شو قلت حمدان حمدان: قلت اني تقدمت لبنت عمي و اني اباها هزاع( وهو فاج حلجه من الصدمة) : كيففففففففففففففففففففففففففف؟؟؟؟؟ ما يستوي!!!
|
|
|
27-12-2007, 02:34 AM
|
#23 (permalink) |
|
عضو مشارك
|
|
|
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | إبحث في الموضوع |
| انواع عرض الموضوع | |
|
|
العرض العادي
