ما عنده إلا يا بأخذ عليش لو باطلقش

ماي ورد · 06-03-2008, 11:14 PM

ام حسين: والله العظيم يم عارف محتاره، هذا ريلي وأحبه وابو عيالي، بس منقلب حاله ما أدري ويش اللي صار له ما عنده إلا كلمتين يا بأخذ عليش ياباطلقش, حاسه وياه بالزيغ والمر، وأحس طول اليوم بحراره في راسي وصدري من التفكير.

أم عارف: والله غريب كلامش يم حسين، أني لو ما أعرفكم جان ما أستغرب، بس أعرف أبو حسين حاطنش في عيونه.

أم حسين: حاطني في عيونه لول، قبل خمس سنوات أول ما عرسنا، لسانه ينقط عسل وما يمر أسبوع إلا جايب لي ورده لو هديه، صرت اتحسر على ذيك ليام، كنت أحس نفسنا مراهقين وكان يحسسني اني بنوته صغيره. مو الحين أحس نفسي عيوز خيبر.

أم عارف: زين قول ليي ويش اللي صار، أني ما سمعتش من أول تشتكي، وزي ما قلتلش علمي بكم حبايب.

أم حسين: أني ما أحب أتكلم عن اسرار بيتي وريلي، بس ما ني قادره خلاص حاسه بالضيقه , الظاهر حاط في باله يبغى يعرس قام يتحجج كل يقول أنتين هاملتني وهامله البيت، ريحتش سمج وبصل وريحتش ثوم أمسوني كني "منيو" حق مطعم، لكن على قولتهم الريال ماله امان، ولا مو حافظ آيه من القرآن إلا " مثنى وثلاث ورباع"

أم عارف: أم حسين، الريال يحبش وما شكله يبغى يعرس والله كان ما جاب سيرة الطلاق، وكان من الافضل تتكلمي وياه وتعرفي منه ويش يبغى لا زم يصير بينكم تفاهم، ثانياً تراني باصير صريحه وياش، أني ملاحظه عليش من فتره وزنش زايد، وكأنش أهمليتي شوي في شكلش.

أم حسين: يم عارف، يعني ويش اسوي اهد البيت والاولاد وشغل المطبخ، وأقعد طول اليوم اقلب مجلة سيدتي وزهرة الخليج، وداشه في مشغل وطالعه من خياط وهادي سالفتي، يعني بدل ما يقدرني ما ني طالبه منه خدامه وحاطه كل شغل البيت على راسي.

أم عارف: لا مو جديه أني ماقلت اتركي كل شيء وصيري مذيعة تلفزيون، ولا قتلش سوي له سالفه لين يجيب لش خدامه، بس على قولة المثل " لا كله ولاخله"، يعني مثلاُ قبل لا يجي بنص ساعه من العمل، رتبي البيت رتبي حالش، يعني رتبي وقتش مو لا زم تهملي البيت ولا تهمليه.

أم حسين: أذاني بسمع كلامش وبتفاهم وياه، وفي نفس الوقت بهتم بحالي باشوف يتغير لولا.

هل تكون المرأة في بداية الزواج مهتمه ببيتها وأناقتها وبعد الزواج وتراكم المسؤوليات تبدء في تضييع الأولويات وتهمل نفسها مما يسبب البرود العاطفي بين الزوجين وربما يؤدي لمشاكل أكبر من ذلك وما هو الحل وماهي مسؤولية الزوج لحل هذه المشكله.

__________________منقول

(نور*** الدنيا) · 06-03-2008, 11:41 PM

يسلموووووو

حنين الليل · 07-03-2008, 03:41 AM

مشكوره وتسلمين

FatiMa ALi · 07-03-2008, 10:03 AM

مشكورة و تسلمين ...

أدوات الموضوع	إبحث في الموضوع
مشاهدة صفحة طباعة الموضوع أرسل هذا الموضوع إلى صديق	إبحث في الموضوع: البحث المتقدم
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

ما عنده إلا يا بأخذ عليش لو باطلقش

المنتدى العام